【HolidayMama】「期間限定小旅行」捉住初春嘅尾巴!夢幻桃紅簕杜鵑花隧道 x 絕美日落景

【HolidayMama】「期間限定小旅行」捉住初春嘅尾巴!夢幻桃紅簕杜鵑花隧道 x 絕美日落景


話咁快已經到4月!但係天氣已經熱到有啲夏天嘅感覺,仲已經可以聽到蟬鳴啦~等小編同Mama特派員 Loklokk媽媽 同埋 Loklokk 捉住初春嘅尾巴,一齊去個浪漫小旅行!尋找市區入面夢幻嘅桃紅簕杜鵑花隧道,然後再帶大家去欣賞絕美日落景!


Mama特派員 – Loklokk媽媽 & Loklokk
Facbook:媽姬與樂 生活日誌
Instagram:loklokkmama

第一站:夢幻桃紅簕杜鵑花隧道

簕杜鵑花隧道位於元州邨元盛樓旁邊。首先我哋嚟到長沙灣站C2出口。

一出出口向右轉行幾步遠遠就會見到桃紅色嘅花啦!

簕杜鵑花隧道全場30米,但要講到啲花開得最靚最壯觀呢,肯定就係隧道口呢個位啦!

打卡小Tips:除咗隧道口,其實喺門口側邊有比較垂落嚟嘅簕杜鵑。逆住光影,陽光透過啲花瓣,影出嚟嘅效果更靚啊~

打卡小Tips:入到隧道,可以從低角度仰拍,咁樣除咗可以避開人群,仲可以影到滿滿簕杜鵑嘅背景!

滿滿嘅簕杜鵑,真係靚到好似假咁樣啊!大家都要好好珍惜,唔好破壞。要尊重辛辛苦苦照顧呢個花園嘅工作人員啊!

除咗喺隧道入面,我哋仲搵到一個靚靚打卡位!
就係隧道側面啦~可以一次過影到一整片簕杜鵑做背景,非常靚!

第二站:嘉頓山絕美日落景

賞完花時間又差唔多去到日落時間。浪漫行程又點少得睇一個完美嘅日落呢?
一於帶大家行一行山,路程只需要15分鐘,全程樓梯,小朋友都啱行㗎~

大家可以選擇塔地鐵到深水埗站D1出口再步行,又或者直接的士到美荷樓。

喺美荷樓旅舍右手邊就有一條小路上山。睇到呢個圖標就無搵錯地方啦!

突然要玩伏匿匿嘅loklokk😂😂😂

提醒大家出發前記得search定當日嘅日落時間,最好提早30分鐘上到山頂,咁就唔會錯過日落啦~

全程石屎樓梯!

沿途又見到簕杜鵑,好有緣份啊!

仲有一個非常有特色嘅三角測量站。

原來佢係用嚟作為繪製地形圖嘅三角測量基準點。但依家測量多數轉用衛星定位而唔再使用傳統三角測量,所以好多三角點已經失去原來嘅用途,但都有部分標石點位改作衛星控制點用途嘅!

話咁快就上到第一個平台,無阻擋飽覽日落景色!

真係好靚啊~

但係呢個位相對嚟講就會比較曬,大家可以沿住樓梯上多一層。

可以喺有遮蔭嘅地方賞日落!(斜坡上請注意小朋友安全!)

今日我哋真係好好彩,天氣非常好,睇到個好靚嘅日落啊!

睇埋日落,真係一個超完美又滿足嘅一日啊!

提一提大家,自己垃圾記得自己帶走,要好好愛惜大自然環境啊!
Loklokk:呢度唔係自己地方嚟㗎嘛!

今日嘅浪漫小旅行就告一段落啦!以上相片都係用手機拍攝,希望各位都可以跟住打卡影到靚相啦~有緣再同大家再去小旅行啦!

活動資訊

簕杜鵑花隧道
地址:元州邨元盛樓旁邊
開放時間:24小時
交通方法:長沙灣站C2出口

嘉頓山
開放時間:24小時
交通方法:深水埗站D1出口,經過高登電腦中心,沿欽洲街前行,經過嘉頓麵包公司,到巴域街見石硤尾邨轉右,到達美荷樓青年旅舍,荷樓旅舍右手邊小路上山。

注意事項:
– 記得做好防蚊防曬措施
– 請預先搜索當日日落時間,早約半小時到達山頂
– 愛護環境,將自己垃圾帶走
– 山落後山路會較黑,請帶備電筒或其他照明設備