【健康天然】芒果百香果果醬@CookingMama

【健康天然】芒果百香果果醬@CookingMama


時下嘅父母好緊張自己嘅小朋友,最緊要都係小朋友健康快樂地成長。當然飲食係好重要嘅一環,所以父母會盡量為子女準備天然有益嘅飲食。

今次選擇做自家製嘅果醬,糖份可自己調較,無防腐劑、無添加先係最天然嘅~

《百香果功效》
營養豐富,含有豐富嘅蛋白質、膳食纖維、維生素ABC及鐵質等營養成分。百香果仲有排毒養顏同增強免疫力嘅功效,仲可以幫助消化。由於佢帶一點酸甜,所以我特別用佢配合埋好受歡迎嘅芒果,令味道更可口、更容易接受。

果醬除咗可以塗麵包用,其實仲有好多用途架~例如伴乳酪,窩夫,沙律等等…… 有咁多用途,唔試就走寶喇!

*材料足夠做 1樽大或2樽細果醬*
材料:

芒果 3個
百香果 4個
糖 50克
青檸(汁) 半個

步驟:

1. 將芒果切成大粒;
2. 拿出百香果果籽及汁液。
3. 將芒果放入攪拌機攪成芒果蓉。
4. 將芒果蓉放入鍋內。
5. 加入百香果及糖,以細火慢煮,煮時攪拌避免煮燶,煮大約35分鐘。
6. 加入青檸汁,再煮 5 分鐘,熄火。
7. 把玻璃瓶消毒。
8. 趁熱放入玻璃瓶後蓋上;
9. 倒轉瓶蓋向下。這樣做可令瓶內多餘的空氣排出,成密封狀。放涼後就可以放入雪櫃。

《玻璃瓶處理》
1. 先洗淨玻璃瓶
2. 放入滾水煲大概 5 分鐘消毒。拿出風乾(亦可以用焗爐70度烘乾)

《小貼士》

*玻璃瓶要清潔乾爽,果醬先能保存得耐,唔會發霉
*冷卻的果醬會比熱嘅時候黏
*密封的果醬可放半年

=====================
cover
一個喺服務性行業工作的在職媽媽,平日十分忙碌,工作壓力好大。我有一個十分為食嘅家庭,家庭對我好重要,所以我除咗會用好多時間去陪伴我屋企人之外,我更會用工餘嘅時間去滿足兩個老闆:囡囡及老公嘅為食要求。每一次見到我嘅朋友或者屋企人好享受我煮出嚟嘅作品,都會覺得好開心,家人同朋友嘅讚賞係我煮嘢食嘅推動力!