【Mama心聲】感謝家中兩個暖男,給我生第二胎的勇氣。

【Mama心聲】感謝家中兩個暖男,給我生第二胎的勇氣。


生完唯b之後,當有人問起會唔會生第二胎呀?我都會答「一定唔會」。因為陀唯b實在太辛苦,懷孕初期日嘔夜嘔,飲水都嘔;經常要去大便,最高紀錄係一日去7次;而且即使我食量唔多,又有好好控制飲食,但成個孕期,我都重30幾磅。我係一個細碼媽媽,所以覺得懷孕真係好攰、好辛苦。而最大嘅原因就是,生產過程太痛!仲有好多懷孕同坐月時嘅辛酸,令我決心唔再生,所以我一早已將唯b嘅初生衫、bb床、high chair等用品轉贈他人。

直到有一日,唯b抱住我親戚嘅初生bb時,講咗句:「我要妹妹呀」。當下我都冇太大感覺,覺得只係小朋友隨口講吓。返到屋企時,佢自己一個坐喺度玩,突然又講多次:「我要妹妹呀」。我就開始諗,佢有個弟/妹會唔會真係好啲呢?由於我同唯爸都係獨生子女,對於有冇兄弟姊妹嘅感受唔算深,亦冇特別渴求。

但自那一天開始,我不停諗,好唔好真係生個弟/妹畀唯b呢?呢個問題關乎到經濟、住屋環境、照顧者嘅工作量等等 。諗完一輪,最後我諗到,唯b可以有一個相知相伴嘅手足一齊成長,係一件好溫馨難得嘅事。而當我同唯爸死後,唯b喺世上至少仍有一個親人,我就決定:生!

另一個最大嘅原因就係唯爸。基本上,我做嘅任何決定佢都會支持,生唔生,佢都覺得只要我開心就好。唯b初出世時,我曾經覺得佢唔太錫唯b,但慢慢知道只有媽媽先會感受到十月懷胎、骨肉相連嘅感覺,媽媽係唯一一個曾經同bb每分每秒都共存嘅人,感受自然比爸爸深,但唔代表爸爸唔愛bb。事實證明,佢都好愛唯b。見證住佢嘅努力同進步係令我放心再生bb嘅原因,佢由一個「生手」爸爸努力學習成為一個熟手爸爸。無論佢嘅能力如何、結果如何,其實只要佢願意努力,我都已經好心足。

再次懷孕的確唔容易,因為除咗要承受懷孕不適,仲要照顧唯b。可幸嘅係,我身邊有兩位暖男:唯b和唯爸。謝謝你倆,給我生第二胎的勇氣。

======================
唯媽,以文字為生的在職媽媽。自從唯B以BLW的方式加固後,我才發現煮BB餐比煮盛宴更難,但見他享受食物的樣子,那份滿足感使我不斷學習下廚,希望繼續與大家分享幼兒食譜。

FB Page:唯玩.唯樂.唯在學