【唯媽產檢全紀錄】到底頭3次產檢係check咩?超聲波?唐氏?一一解開!

【唯媽產檢全紀錄】到底頭3次產檢係check咩?超聲波?唐氏?一一解開!


我9月知道有咗唯妹,去私家醫生度拎咗懷孕證明,用app登記後10月就第一次去QE見護士。

去到日間護理中心四樓(我同唯爸都係非公務員)有護士指示我去量血壓、度高、磅重(全自助式),然後等叫名入去聽講座,講大約當日有咩流程,同喺QE生bb嘅服務。

聽完就出返去等叫名見護士。護士會問家族病歷等問題,再幫我約其他期。有位嘅話,即使孕婦唔係有高風險懷孕情況,都會有唐氏篩查及結構期(我係低風險孕婦,好好彩有晒呢兩個期)。護士仲問我係咪想好似上胎咁入返助產士小組,跟返上胎個助產士。我當然想啦,因為上胎個助產士好好人,會喺成個孕期跟進我嘅情況,如果咁啱我生果日佢要當值,仲有機會幫我接生!不過想還想,都要到幾個月後見醫生,由醫生評估我嘅情況係唔係可以交由助產士跟進。記住如果要病假紙要同護士講,到診紙可以由護士出,但病假紙就要等醫生當值先簽到。見完護士,去二樓抽埋血,再等醫生巡完房簽病假紙就走得喇。

由於我喺私家診所驗nifty pro,所以讓返個期出嚟,冇喺QE做唐氏篩查。

(註:非QE照結構圖)

第二次去醫院就係照結構喇(懷孕大約第21週)。跟返覆診紙上嘅指示,循例上要先去會計部「付款」,但其實係唔使錢嘅。之後就去照喇。有咗上胎嘅經驗,都知道喺QE照結構大概係點,唔會好大期望。照結構由助產士進行,好好彩我兩胎遇到嘅助產士都係好友善同細心嘅,當然唔會好似私家醫生講解得咁詳細,但喺有限嘅時間同好多人等候嘅情況下,已經算照得唔錯喇。我係下午嘅第一個,所以唔使等,而唯妹又好合作,整個過程大約20分鐘就完成。

第三次產檢安排喺大約半個月後,返QE見醫生(懷孕大約第23週)。一去到都係驗小便,量血壓、度高磅重。之後聽護士講座,內容圍繞母乳、入院張卡,同睇返驗血報告。手持張入院卡,孕婦有咩事就可以直接去產房,唔使去急症室排隊。見醫生嘅過程大約係5分鐘,佢摸一摸肚,聽BB心跳,再話俾我知我可以入助產士小組就走得。

距離生唯妹尚有大約10星期,下次再同大家分享其他QE產檢嘅紀錄。

==========================

唯媽於大學時期修讀英國文學,愛文字愛閱讀,望能感染唯B,做個不只知識,更知性的人。
此專頁記錄唯B的BLW歷程、分享唯B在玩樂之中學習、成長的生活點滴。

Facebook:唯玩.唯樂.唯在學