【新手Mama必學】小朋友出牙仔有咩徵兆?原來舒服出牙好簡單!

【新手Mama必學】小朋友出牙仔有咩徵兆?原來舒服出牙好簡單!


BB差唔多去到6個月大就開始出牙仔扭計,到底出牙小朋友出牙係咪會成日發脾氣、唔想食野、訓得差、發燒肚屙呢?小編今次就同各位媽媽分享下到底要出牙嘅BB有咩特徵同埋有咩舒緩嘅方法啦~

1. 口水較多 - 多抹走口水

好多時流口水其實係小朋友出牙仔嘅其中一個過程,因為要令BB口腔一直含水,令牙齒生長嚟嘅時候唔會破壞咗牙床,所以當唾液腺分泌多咗,成日流口水就有機會令小朋友嘅下巴周圍粗糙甚至長皮疹,所以媽媽們要經常幫佢地抹口水,保持BB嘅下巴乾燥~

2. 牙齦腫痛 - 按摩牙齦

如果BB嘅牙齦腫咗,唔舒服就好容易發嬲同時亦可能咩都咬一餐,媽媽可以先用自己手指感覺下係咪有牙仔出緊,正常當牙齒穿過牙齦之後,佢就會慢慢自動消腫(大約需要1-7日)。想小朋友冇咁辛苦可以俾啲有一定硬度、冰冰涼涼嘅食物按摩牙齦,例如凍凍地嘅蘿蔔或者青瓜條,不過如果BB嘅牙齦真係有異常嘅腫脹或者潰爛的話,當然要及早求診啦~

3. 食欲不振 - 進食涼爽軟食

BB出牙仔唔舒服又唔識講出口,喺媽媽餵奶嘅時候可能會變得更加浮躁,因為小朋友咀仔一啜就會搞到牙牀痛,自然就令佢地唔想食野啦~牙齦腫痛係會令人唔想食啲太熱嘅食物,所以媽媽們可以俾BB食啲涼爽啲嘅流質、半流質或者軟食嘅野食。如果BB用奶樽都唔願意吸吮的話,可以試下用杯或者匙羹,盡量方便小朋友進食。

4. 睡眠不佳 - 午睡時間減少

其實BB出牙仔嘅時候好容易會痛到夜晚札醒,當然呢個情況好難可以控制,但係媽媽們可以試下喺佢地醒嘅時候唔好急住餵佢地食野,等佢地慢慢平伏先,同時亦可以試下唔好俾小朋友訓咁多晏覺,縮短少少佢地嘅午睡時間等佢地夜晚可以訓得好啲。

有好多傳言都話小朋友出牙仔會發燒同肚屙,其實出牙並唔會有呢兩個情況,一般都係因為佢地牙肉痛會經常四圍拎野放入口,所以先會較易令BB容易病。媽媽們學識以上四招就可以令BB(同自己)喺出牙期輕鬆啲冇咁辛苦喇~