《我愛Mama》5、6月之星專訪

《我愛Mama》5、6月之星專訪


首先恭喜晞晞同Jayvis成為《我愛Mama》5、6月之星,亦感謝晞晞同Jayvis一家人出席我地嘅High Tea Gathering!小編們同兩位可愛嘅每月之星&爸爸媽媽飲飲食食傾下父母經,又了解多啲新手爸媽嘅心路歷程!

【五月之星】晞晞

岩岩過咗一歲生日嘅晞晞好鐘意笑,只要你同佢對到眼神佢就會對你笑,平時應該冧到爸爸媽媽暈晒!晞晞成程都好乖喺到食野,間唔中仲會同爸爸嚟個深情對望,小編都冇眼睇啦(羞)~

6

【六月之星】Jayvis

一樣都喺一歲大嘅Jayvis就明顯比晞晞高好多,同埋超級鐘意食野,一嚟到見到滿枱食物已經要媽咪比佢食喇!而且Jayvis比較好動,去到訪問中期佢已經放晒電瞓著咗喇~

1

【懷孕&生產過程】

晞晞媽咪話當時係突然有咗BB,初期唔係好舒服,到10幾周到仲試過見紅,好彩check完係冇事,但因為陀唔穩就就決定辭職養胎,一直到宜家都未捨得返工。生晞晞個陣係33周緊急順產,個陣穿咗水但又未開夠度數,前後出入產房4次,最後嗰次2個幾鐘就生咗晞晞出嚟,不過因為未足月老公唔可以入產房陪住,都係一個遺憾。

Jayvis媽咪陀BB個陣成日都覺得好攰,平時行街可以行好耐,有咗BB後行一陣就好攰,所以成日都瞓教。個陣到足月BB都未出嚟,就去打催生針,生佢個日由凌晨2:00am穿水入院,到朝早10點就生咗出嚟。不過好可惜BB一出嚟冇得喺產房抱住佢影相,要出咗去先影得。

2

【親子假日好去處】

晞晞媽咪話通常都係星期六日一家人去商場,一定要去有親子餐廳嘅地方,例如愉景新城就有好多,嗰到有個中央公園有時段可以比小朋友去爬。平時就每日帶佢去買餸,等佢見多啲人,冇咁怕人。

Jayvis爸爸就話有咗小朋友之後去邊都會諗佢先,通常都係去商場event,或者同嫲嫲飲下茶,去戶外又怕比野咬,跑跑跳跳嘅野又未岩玩。以前拍拖個個星期都會去睇戲,但宜家真係好耐冇去喇!媽媽就話就算去睇戲都係平日收工後,一睇完就想快d返去陪小朋友,因為平時已經要返工冇時間陪佢,星期六日就一定唔會掉低佢。

4

【贏在起跑線?】

晞晞媽咪話:唔會逼晞晞,因為我地自己細個都係咁長大,做咩又要逼小朋友優勝過人?我地就希望比個輕鬆嘅童年小朋友!不過爸爸就有講笑咁講過比佢學d特別嘅野,不過都係將來先算啦,唔會逼佢~

Jayvis媽咪就話好似自己親戚小朋友都係學學下鋼琴就話唔鐘意,所以呢啲野係冇得逼嘅~

【對BB的期望】

晞晞媽咪最想BB可以簡簡單單,做自己開心嘅事,正如第時佢想學咩就比佢學。

Jayvis媽咪就想BB身心都健康,善良同開心最緊要,其他野冇要求。

3

【點樣學做新手媽媽?】

晞晞媽咪之前都好擔心唔識湊,所以有時間就會參加奶粉公司搞嘅學堂,免費參加嘅,有醫生姑娘講talk,教點樣幫BB沖涼、餵奶等等。

Jayvis媽咪就話兄弟姊妹都生咗小朋友,所以都有幫手湊過小朋友,有咩問題都可以問佢地。

batch_DSC09761

【長輩湊小朋友意見分歧?】

晞晞媽咪話同奶奶一齊住,平時都係自己湊,有時接course教要出去就奶奶幫手湊,不過初時奶奶都唔知呢一代教法唔同,但同佢講咗佢就明白,衛生問題都會改善,加上BB係早產,岩岩出世就會特別留意衛生。

Jayvis媽咪就話平日自己同老公都要返工,朝早就會湊小朋友去嫲嫲屋企,夜晚收工上去食完飯就湊返屋企,嫲嫲都會聽自己意見,比BB食野之前都會whatsapp咗自己先。

【爸爸媽媽:黑面白面?】

晞晞媽咪Jayvis媽咪都不約而同話爸爸係慈父,自己係嚴母!Jayvis媽咪話只要自己大聲d話BB,爸爸就會話細聲d,晞晞媽咪就話BB知道自己比人鬧,會不停眨眼,扮喊,但又會繼續曳。

7

【做Mama最辛苦的事】

晞晞媽咪就話做全職媽咪就預咗所有野都要做,不過見到BB開心就咩都夠,雖然有時見到身邊嘅朋友去行山自己都好想去,但為咗BB都唔會話特別想要自己私人時間,都想陪佢多d,一家人一齊就開心。

Jayvis媽咪話做媽咪嘅都會為咗小朋友放棄所有野,最辛苦反而係冇時間陪小朋友,成日心掛掛咁,如果要再生第二個就一定要全職陪佢。

【做Mama最大樂趣】

晞晞媽咪話見到BB學到新野就好開心,例如做到拍手byebye個啲指示,覺得佢真係大個咗,之前仲擔心佢唔識。

Jayvis媽咪就話都係睇住佢一步步大個,由爬、轉身到行,好多野都係突然之間學識,好快就大個。

8

今次呢兩pair每月之星爸媽都係新手父母,言談間睇得出佢地都好錫小朋友,最想就係陪喺小朋友身邊,睇住佢一步步成長!最後祝福呢兩位可愛嘅每月之星快高長大,健健康康!