父母們 Keep it Cool!-Saron Mama@我愛Mama の 人氣爸媽Blogger

父母們 Keep it Cool!-Saron Mama@我愛Mama の 人氣爸媽Blogger


相信每對父母都面對過孩子失控令自己無奈到欲哭無淚的情況,今日我們又面對多次了。

有時孩子扭計的確是天王都無臉比,我很怕那些什麼什麼育兒專家/天書走出來要教父母如何杜絕孩子哭鬧,因為在我來說這套方法適合你孩子的又不代表適合我的,而且我不相信這個世界有不扭計的孩子,如果有,我反而更驚,so anyway,我不是要教大家如何處理孩子在街上失控大哭大鬧(因為我都唔識),反而想分享一下過了這年多當父母的crazy time,如何處理自己在那些瘋癲moment的情緒,更重要是如何跟伴侶可以keep it cool去面對那些「災難」。

其實我是個易忟的人,很多時候我都不太冷靜,但當媽媽後,我覺得自己脾氣反而是好了的,因為可能自己差不多廿四小時對著女兒,如果下下發脾氣其實自己都好辛苦,所以很多時候我都會勁深呼吸,尤其是「災難」來臨的時候,這招老土到不得了的方法其實是最有效的,以前聽人講得多,但大金毛每次在我臨爆炸的時候都會叫我深呼吸,試過幾次之後又幾有效,我就一直用這個最廉價的方法令自己平伏情緒。

自己一個有時還好,因為忟都係忟自己,但當孩子失控時有老公在身邊,很多時候兩個人就會好易開火或者令本來已經好爆的情緒/情況再爆上加爆。我們慶幸無試過因為這樣鬧交,但都試過向對方說一些不應該的說話令當時的情況惡化。因此,綜合少許經驗,我地有少少想分享。

第一. 「合埋把衰口」

講真,當孩子無理地哭到拆天的時候,其實父母的心情更加係無奈到拆天都唔掂,係呢d時候的確好難有好野講得出口,更加易既係講錯野令對方忟上加忟,所以我地呢排當發生「災難」時都係合埋把口的,我老公成日有句名言就係”if you can’t say something nice, don’t say anything at all !”

第二.「不要推卸責任給對方」

真的,好多時當發生「災難」,我地都好容易講「總之你就唔好咁咁咁啦…」「都話左你架啦….」「如果你唔係咩咩咩,就唔會攪成咁啦!」等等等… 其實細路扭計又真係無人應該要負晒所有責任既,唔係爸錯、唔係媽錯,亦都唔可以話係個細路錯,it’s just happened! 都係果句,有邊個細路唔扭計,一係你唔好生,有得小朋友就預左要應付呢d局面,好難面對架啦,但唔好將個負責推比你另一半,只會火上加油,最終變成「三國大封相」…

第三「賽後檢討之前先黎個擁抱」

呢招好有用,雖然好多時一攬果下我都會爆喊(因為有時真的好瘋癲加上覺得好大壓力)但其實果下好釋放到自己既情緒,亦都係跟伴侶好好放下果一口戾氣既時刻。我通常攬完老公都會多謝佢,然後讚佢今日做得有幾好,處理得有幾冷靜,真架,當你識欣賞佢時,佢一樣會讚返你,然後會將整件事由好負面變成好正面。然後大家再去評估下下次有咩可以改善。聽落好似懶勁咁,但其實大家都做到,雖然小朋友好多時扭計都好無理,但或多或少都會有d誘因,大家一齊replay返點解佢係果個moment break down,係唔係因為某d原因下次可以盡量避免呢,又或者當同類事情再發生時,大家又可以點處理得比今次好…

我跟大金毛最珍貴的地方就是”open communication”,無論什麼,其實有得傾就有得解決或者進步,所以大家都唔好將感受成日收埋,就算一d唔好既意見或者看法其實都應該坦誠跟對方講,當然用字語氣態度大家要諗清楚先表達。

都係果句,每個小朋友、每對伴侶都是獨一無二,大家都有自己相處之道,但有些東西卻是一段關係一定不可缺少的,我地都有好多好好好洩氣的moments,大家一齊努力!夫妻唔易做,父母更加唔易做,要做到一對在孩子爆發戰爭的時刻仍然keep it cool的父母更更更加不容易,keep flighting parents !


=======================================

saron書店偶遇,一見鍾情。 文化差異令每天過得更可愛。 童話成真,幸福繼續延續下去。 結婚同年,於FB開始粉絲專頁「一三年夏天,嫁了去加拿大」,大受歡迎。 SaronBrett現居香港,並育有一囡柔謹及懷有囝囝,將於十二月成為第二任媽媽。曾於國際學校任教的Saron現為全職媽媽,專心相夫教子。

Facebook Page:一三年夏天,嫁了去加拿大