【黃疸是正常嗎】初生BB黃黚黚,可以點做?

【黃疸是正常嗎】初生BB黃黚黚,可以點做?


有邊個爸爸媽媽唔想自己BB易湊,以為生完BB出院之後,返到屋企就可以安安樂樂~點知BB膚色一日比一日黃,應該點做好?

根據衞生署嘅資料,原來BB出世後,由於可以直接吸入氧氣,需要嘅紅血球數量比起喺媽媽肚入面時少,所以紅血球分解會暫時增加,而產生膽紅素。初生嬰兒肝臟未完全成熟,係處理唔到咁多積聚嘅膽紅素,所以有機會有生理性黃疸。正常嚟講,呢種成因嘅黃疸喺出世後大概2-3星期就會退,而且對大部分嚟講BB係唔會影響健康。

傳統方法 辨識黃疸

有一種方法教大家自己喺屋企判斷BB有冇黃疸,就係用指尖輕輕壓BB個鼻,如果鼻頭皮膚呈白色,代表BB冇黃疸;如果皮膚呈黃色,就有機會有黃疸。另外,通常黃疸BB都會覺得好攰,父母留意到BB有黃疸,可以打返去屋企附近嘅母嬰健康院,健康院會安排你盡快(可能係即日)到健康院驗膽紅素。

膽紅素數值高,都未必需要好擔心。醫生會叫你幾日後再到健康院覆診,最緊要係BB食得、訓得、生長情況穩定,咁通常第二次去覆診時,由於肝臟慢慢成熟,膽紅素數值會變返正常,肉眼睇BB都冇咁黃黚黚。

生理及病理性黃疸

萬一黃疸唔退,就可能要轉介兒科作深入了解再治療,一般膽紅素過高嘅BB都要到醫院接受光線治療,俗稱「照燈」,一般生理性黃疸只要透過照燈,加速代謝膽紅素能力就可以出院。但如果黃疸係屬於病理性,原因可能係溶血性疾病、感染敗血症、肝炎等等。病理性黃疸BB會有嗜睡、煩躁、嘔肚、發燒嘅症狀。不幸地發現BB有以上症狀,一定要馬上帶BB到有初生兒科嘅醫院診治。

病理性黃疸可能會有嘅症狀係大便呈灰白色,而呢個症狀成因有可能係患上先天性膽管閉塞,父母必須帶BB去醫院進行詳細嘅檢查。另外,葡萄糖六磷酸去氫酵素缺乏症(俗稱蠶豆症)/G6PD亦有可能導致黃疸,香港大約有4.5% BB缺乏呢種酵素。不過,一般喺出世後醫院已經用BB嘅臍帶血去驗,出院嘅時候會同媽媽講驗血結果。如果BB有蠶豆症,應盡量避免接觸某啲中藥如金銀花,西藥如抗生素,臭丸、樟腦等等。因為呢D物質會令蠶豆症患者出現溶血症,而導致黃疸。

母乳黃疸

最後仲有一種黃疸係因為餵哺母乳而出現,由於乳汁有機會令BB膽紅素增高,但係並唔會影響BB健康同發展。如果黃疸唔嚴重,媽媽可以一邊觀察BB情況一邊餵哺,通常唔會有好大問題。亦有可能係因為奶量不足,而排便少,所以膽紅素難以排出。但係,媽媽仍可以繼續餵哺母乳,可以透過學習正確哺乳方法嚟增加奶量,母嬰健康院定時會有母乳指導姑娘協助媽媽。

黃疸其實係一個好常見嘅情況,媽媽記住要多啲留意BB情況,透過治療好快就會退~

參巧資料:家庭健康服務- 新生嬰兒黃疸 http://bit.ly/2WcACJ5