【一晚長大】初生嬰兒猛長期-新手爸媽要留神!

【一晚長大】初生嬰兒猛長期-新手爸媽要留神!


點解喊極唔停?點解食極唔飽?唔通佢病左?

原來大部分BB都會經歷「猛長期」,第一次猛長期通常喺醫院返屋企之後幾日發生,跟住到2-3個星期、4-6個星期、3個月、4個月、6個月同9個月大嘅時候又會再出現。當你發現BB有古怪,就好大機會係猛長期嚟喇!媽媽們唔好以為BB病,雖然猛長期會令BB感到唔舒服,但都係屬於正常現象!

BB出世至一歲,size大約會增加3倍。但係增長並唔係慢慢發生,原來喺猛長期期間,BB係會「一晚長大」。BB有以下特徵,媽媽就要加倍用心照顧BB喇:

1. 明顯地胃口大增

猛長期時,BB需要更多食物幫助身體成長。如果媽媽係餵母乳嘅話,BB進食時間會耐咗,餐與餐之間嘅時間會短咗;餵奶粉嘅話,食完正常份量,都覺得唔夠飽,可能要開多幾安奶畀佢。

2. 改變睡眠習慣

由於睡眠時,腦部會製造幫助成長嘅荷爾蒙。猛長期BB會比平時瞓多幾個鐘。唔好以為咁就好輕鬆呀~因為好大機會瞓覺期間都會好扭計,仲可能扭得多過平時,呢種現象都係正常,因為BB係回應緊佢身體嘅變化。

3. 情緒起伏較大

媽媽最怕嘅就係BB喊到收唔到聲,由於BB體內嘅能量都用咗嚟生長,所以會對外來事物好敏感。BB會透過哭鬧去宣洩不滿,所以喊嘅時間會比平時多同長。

如何正面回應BB需要?

留意BB肚餓會發出嘅信號,例如擘大口、頭仔擰擰、手舞足蹈等等。母乳媽媽唔使擔心,你身體係會好聰明地製造更多母乳滿足BB,如果你發現唔夠奶,可以盡量增加埋身餵嘅次數刺激奶量~另外,媽媽記住要為身體補充足夠水份,咁會容易D上奶。炒米茶或者湯水亦好有幫助,記住照顧BB同時都要照顧好自己。

其實BB喊,係需要你嘅安慰。媽媽可以抱下BB嚟安撫佢,可以舒緩佢身體上嘅不適同畀到安全感佢。猛長期雖然會令到媽媽好攰,但係見到BB長大,乜都值得啦~留意BB情況,若有異常,都要搵醫生尋求意見呀!

參考資料:http://bit.ly/2EZ051B