【$88玩全日!】另類假期體驗,一日玩盡釣魚、摸海星、餵魚生態遊!

【$88玩全日!】另類假期體驗,一日玩盡釣魚、摸海星、餵魚生態遊!


今日天氣唔算好曬,我哋約埋幾個朋友仔去咗南丫島玩,參觀左南丫島漁民文化村 Lamma Fisherfolk’s Village,食埋海鮮、豆腐花、茶果,玩足大半日!

南丫島大家去得多,南丫島漁民文化村大家又聽過未?

我哋10點出發,由中環搭船去南丫島索罟灣,船程大約40分鐘。落船轉右行幾步就到南丫島漁民文化村嘅售票處。

門票:
普通門票大人$80,小童/長者$60
如果想多4張遊戲卷同一份小食,成人$128,小童/長者$88

遊戲券好有用㗎,可以換魚仔餵魚!

買完飛之後,工作人員就會安排免費穿梭船去文化村,其實搭一兩分鐘就到

一上到岸已經有好多舢舨、兩隻龍舟俾大家影相!

影完一輪相,睇吓人哋釣魚,食下魚蛋;之後就去參加導賞團。

導賞團每個鐘都有,唔使特別預約。

門票已經包左導賞團嘅費用,成個導賞團都好有趣,大人小朋友好投入。

1)我哋先參觀古漁船,睇吓水上人家點樣喺船上生活,同埋認識下一隻漁船嘅結構。

(百年修得同船渡 千年修得共枕眠 — 水上人家好重視意頭,所以兩夫妻嘅枕頭係連埋一齊的!)

2)之後就逐個餵魚區睇,工作人員會介紹各種魚,今日見到沙巴龍躉、魔鬼魚、各種班、墨魚等等。 工作人員會示範餵魚,個個見到啲魚爭住食嘢都好興奮

最搞笑係餵魔鬼魚,魔鬼與身體唔係好靈活,喂唔正佢個口佢就食唔到啦

墨魚食魚原來都幾特別,佢哋伸啲啲觸鬚出嚟捲着條魚食。

3)然後就去咗一個池,介紹一啲喺附近水域捉到嘅海洋生物,有海星、馬蹄蟹(即係 「 鱟」)、毛蟹、小鯊魚等等!工作人員會用網拎起海星同馬蹄蟹,大家可以伸手摸下!!

馬蹄蟹(即係 「 鱟」)

導賞團完咗之後,我哋就去咗玩冇鈎釣魚。一張遊戲咭可以換一條魚來做冇鈎釣魚,工作人員會將條魚綁好,跟住拎住支竹竿,就可以去旁邊嘅冇鈎釣魚區釣魚啦!

呢個範圍嘅魚全部都好大條!!!

放啲魚餌落去釣魚,原來都幾刺激,因為啲魚會好大力咁食咗啲魚餌~我哋掌握唔到釣魚嘅技巧,空手而回。。。不過幾個小朋友就睇到嘩嘩聲!工作人員話真係會有人釣到魚,釣到的話中可以免費拎走,近近地可以拎返去南丫島叫餐廳煮嚟食!

Natalie同D朋友仔就最鍾意餵魚,兩張遊戲卡就可以換到一桶魚仔,基本上個個餵魚區都可以去餵。經過試驗,墨魚就唔太肚餓、魔鬼魚就好難餵到佢食、沙巴龍躉同鱸魚嗰個池啲魚最踴躍!平時去到街市又嫌腥又嫌污糟嘅小朋友,嚟到呢度竟然肯戴起手套、拎起一條條嘅死魚喺度餵,真係一個好好嘅體驗!

如果唔想玩啲體力咁消耗嘅活動,你可以用四張遊戲卡玩一個材料包做手工,可以整小帆船、風鈴、釣魚遊戲等。

之後我哋就喺魚排行嚟行去、盪千秋、影吓相,玩到夠就搵工作人員安排我哋搭返接駁船去南丫島,大約等咗5分鐘就有船送我哋出去。

其實南丫島漁民文化村都有啲簡單嘅食物,不過我哋一心去南丫島食海鮮!之後就去咗富記食海鮮,我哋七個大人四個小朋友,食咗炒蜆、油鹽水煮蜆、海鮮湯、白灼蝦、清蒸沙巴龍躉、富記炒飯、豉油王炒麵、炒左碟菜,最尾仲送鮮甜嘅菠蘿,買單大約$1500,食物都幾新鮮好味,性價比唔錯

最尾見未夠鐘上船,我哋又行多幾步去睇咸魚,去仁記買豆腐花、茶果、糯米糍,終於玩到夠鐘先上船! 大家都非常盡興

溫馨提示

- 來回中環同索罟灣嘅船班次唔係好密,如果大家唔夠腳骨力由索罟灣行去榕樹灣,咁就要睇清楚搭船嘅時間啦~

- 南丫島漁民文化村嘅洗手間好乾淨,絕對唔係好似平時大家去郊外嘅公廁咁樣!

- 南丫島漁民文化村大部份地方都係露天㗎,天氣好嘅時候要做足防曬措施。

==================

活動資訊

南丫島漁民文化村

開放時間:10:15am-6pm

官網:http://lammafisherfolks.com.hk/tc/

==================

自從做左Nat媽媽之後,忽然發現時間太少但想做的事太多,記性太差但想記下的事太多,的起心肝開始寫低做過的/玩過的/用過的/吃過的/經歷過的~

Facebook:Natmama