【HolidayMama】親親大自然一日遊!隱世餵羊親子好去處

【HolidayMama】親親大自然一日遊!隱世餵羊親子好去處


依家流感/麻疹咁勁,我哋都盡量避免去啲人多嘅地方,唯有去郊外行下啦!而且今日天氣咁好,唔去郊外行吓好似有啲浪費!於是,一行四人就出發去雷公田飲牛奶、餵羊咩咩!

我地嘅目的地係元朗農場鮮奶有限公司。駕駛人士可以直接開車去嗰度。如果好似我哋冇揸車嘅,就可以喺荃灣地鐵站或者荃灣西地鐵搭51號巴士。

去到雷公田村站落車。

雷公田村行入去大約15分鐘,就會見到元朗農場。

喺村口落咗巴士,行入去嘅整段路都係好容易行嘅石屎路,我哋推埋BB車都冇問題!不過要注意一下都幾多車出出入入,要小心啲。

沿途經過幾個燒烤場,竟然一個人都冇,其實下次可以順便燒埋烤或者野餐~

行到見到乳牛pattern嘅大石就到喇!

羊咩咩已經喺度等緊大家!

入到去之後,Natalie見其他小朋友喺度餵羊,已經不停催我地去買草!!!

$3一紮嘅草好抵玩,我地encore左幾次

Natalie餵得好興奮,不停叫我地引開啲大隻嘅羊,等佢可以餵到啲羊Baby~細佬雖然唔識餵,但佢第一次見到羊咩咩,行行企企都好開心^^

餵完一大輪終於肯坐低食啲嘢!

呢度最出名就係佢嘅鮮奶!於是我哋嗌左鮮奶、鮮奶芒果布甸、燒賣同埋餐肉煎蛋公仔麵

鮮奶真係又濃又滑,本來想買盒返屋企,不過老闆話一個鐘內要放返入雪櫃,我哋驚趕唔切,唯有放棄啦~雖然附近得呢度有嘢食,但佢嘅價錢都唔會離晒譜咁,收費好合理的。

走嘅時候發現,原來呢度係對住甲龍林徑嘅出口㗎!下次可以行完山之後先來食嘢!

==================

活動資訊

農場鮮奶有限公司Farm Milk Co. Ltd.
地址:元朗石崗甲龍村雷公田78號
電話:2832 9218
營業時間:
星期六至日及公眾假期: 09:00-17:30
星期一至五休息

==================

自從做左Nat媽媽之後,忽然發現時間太少但想做的事太多,記性太差但想記下的事太多,的起心肝開始寫低做過的/玩過的/用過的/吃過的/經歷過的~

Facebook:Natmama