【媽媽煩惱】女性髮線後移點算好?6招讓你改善脫髮問題

【媽媽煩惱】女性髮線後移點算好?6招讓你改善脫髮問題


好多媽媽雖然依然係年青少艾,但係已經開始有脫髮問題喇~情況仲有愈嚟愈年輕嘅趨勢添!髮線向後移已經唔再只係發生喺男士身上,連女性都有呢個情況出現。作為香港人,工作壓力大又成日精神緊張,訓得唔夠、飲食唔定時、唔均衡,全部都會影響到頭髮生長架~到底點樣先可以改善到髮線向後移嘅問題呢?一齊記住以下嘅小貼士啦!

1. 減少綁髮

無論係綁辮定係馬尾都好容易綁得緊(梗係啦~媽媽綁起辮上嚟方便湊仔做家務嘛),咁樣好有可能會造成牽引性脫髮,令毛囊反覆拉扯,好容易會拉出頭髮,最後變成脫髮。如果各位媽媽經常都要紮頭髮的話,可以盡量試下綁得鬆散啲,最好當然將頭髮鬆散放下。梳頭時,都要緊記唔好太用力去扯呀!

2. 避免經常戴帽

全日戴帽長期有野壓迫住頭部嘅血液循環,頭髮長時間唔透氣,更會容易令頭皮出汗及細菌增加,頭皮一痕,再用手去搔抓就會好易令頭髮脫落架喇~所以可以的話盡量少啲戴帽呀!

3. 避免電髮、染髮

除咗長期嘅習慣會影響髮線問題之外,一次性嘅電髮或者染髮會刺激同傷害頭髮~盡量避免染髮或者用電髮夾整唔同造型嘅時候會令頭髮吃不消呀!

4. 睡眠充足

咩都關睡眠事,唔通真係連脫髮都關訓覺事咩?真係架!睡眠不足減慢新陳代謝,仲會加重內分泌紊亂,間接刺激油脂分泌。如果毛囊嘅負擔加重,亦都會影響到頭髮嘅生長,所以媽媽們~訓覺真係好緊要架呢!記住要盡量避免熬夜呀!

5. 按摩頭皮

媽媽們得閒嘅時候可以用下「手指梳」按摩頭皮,疏通同埋刺激於頭皮嘅經絡。亦都可以喺脫髮或者髮量較少嘅位置,5隻手指合實好似木魚敲打方式,輕輕敲打頭皮,特別喺吹頭後,頭皮有少少熱嘅狀態下敲可以更有助血液循環,同時激活頭皮同埋髮囊,頭髮會易啲生長架!

6. 注意飲食

除咗避免食啲刺激、油膩、辛辣嘅食物之外,仲有啲幫助頭髮生長食療可以喺在家整架~

烏豆芝麻何首烏湯

材料:
烏豆 2兩
芝麻 2兩
合桃 2兩
熟何首烏 2錢
瘦肉 隨意
陳皮 少許
水 4碗

做法:將藥材浸洗再煲約一個半鍾。

功效:食療中嘅藥材全部都冇毒性,所以產前、產後以及餵緊母乳嘅媽媽都可以飲用,可以壯腎富髮、補血補腦,令氣血運行,頭髮生長得更旺盛。

桑寄生紅棗補血茶

材料:
桑寄生 1兩
紅棗 10粒
蓮子 2兩
女貞子 2錢
海綿草 2錢
冰糖 適量
水 1.8公升

做法:所有材料放入水煮一個半鍾(冰糖除外),隔渣後加入冰糖調味。

功效:同樣都係產前、產後以及餵母乳嘅媽媽可以飲用,當中嘅藥材有助補肝腎、氣血,等頭髮健康生長。

就算係年輕嘅媽媽們有脫髮或者髮線後移嘅問題都唔怕喇~記低以上6招勤力地促進頭髮生長啦!