【新手媽媽小知識】餵餵下奶突然消極不安,沒有藥物治療的母乳憂鬱症

【新手媽媽小知識】餵餵下奶突然消極不安,沒有藥物治療的母乳憂鬱症


係生弟弟之後,我嘅身體狀況因爲催乳素同多巴胺平衡唔到,有母乳憂鬱症(D-MER)仲困擾左大半年催乳素係好嘅,令你對bb嘅反應特別敏感,例如對bb喊聲,對bb嘅感動同愛意,所以點解阿媽大多數都照顧周到過阿爸,係個天令老公比較頓啲嘅每當催乳素上升就會幫助刺激上奶,例如我地講嘅(奶陣/谷奶),但上升嘅同時會抑壓體內的多巴胺,若當失衡嘅時候就會令媽媽突然的煩躁不安或消極的情緒,即突發性抑鬱症,所以佢中文名翻譯係母乳憂鬱症,英文係Dysphoric milk ejection reflex。

雖然每次「病發」維持時間唔長,可能2至15分鐘,過左就回復正常,但係都令人好困擾。好似我每當發作就算好唔想都會好燥好易發好大脾氣,老公同大女成日受罪⋯所以我一發作就會盡量獨處/放奶。

發作個情況係點呢?好似本來你仲好開心咁笑緊傾緊計食緊野,下一秒就催狂魔襲擊,一秒內被冷卻全身戙心情跌落谷底,野都講唔到,食唔到,有人掂到你會好反感,就算係餵緊你自己個bb⋯你控制唔到幾時發生,但通常一谷奶就好難受,直到你餵/泵一陣,平衡返佢就回復正常。有啲人過左頭3月就可以回復正常,但我就只係減少左但仲係有並持續左半年。而我第一胎生大女嘅時候係完全無呢個病嘅。

而我嘅case係令我好辛苦甚至影響到日常生活,因為我係好定時咁每兩個鐘就發作,無論我身處何地只要一發作我就咩都做唔到。高峰期每日發作十幾次,而我係無野做到。最無奈係好多醫生唔知咩黎,因為係好少見,發作期太短好難捕捉,亦怕藥物會影響哺乳,唯一斷治方法係停止餵奶⋯⋯所以可以話我一直係靠意志去繼續餵弟弟。慶幸仲有啲同路人,因為無人幫到而自組互助,佢哋亦分享左好多案例同舒緩方法,例如保持適當嘅攝水量,食一啲有助多巴胺嘅食物,而我食維他命b會有助減少病發次數。

咩係母乳憂鬱症(D-MER)呢?
D-MER純粹是一種荷爾蒙反應,是哺乳期婦女乳汁釋放機制的異常現象。其特徵是突然的煩躁不安或消極的情緒,發生在哺餵母乳前,但持續不超過幾分鐘。每個人情況程度都唔同。

詳細可以上網search下了解多啲,或者留言比我一齊傾下, you’re not alone~

=====================

image1-8

豆丁媽媽,一個本來唔入廚房,鐘意食唔鐘意煮嘅人妻,身為人母後去學買餸煮飯,每日鑽研bb食譜。初哥嘅我煮野鐘意簡單方便又吸引,見到小豆丁追住食就最有滿足感~樂意同大家分享我嘅撞板經驗,媽媽們加油!

Facebook page:小豆丁的媽媽日記