【新手媽媽小知識】6個月以上BB加固小貼士!DIY果蓉秘訣!

【新手媽媽小知識】6個月以上BB加固小貼士!DIY果蓉秘訣!


BB一出世就飲奶奶大,一般都會建議小朋友六個月開始加固,可以慢慢俾佢地食奶以後嘅野食~健康院嘅姑娘都有少少指示,如果BB做到以下幾樣野同埋反應,咁就可以試下俾佢地加固喇~

  1. 可依靠椅背坐起
  2. 可自行抬起頭
  3. 可伸手抓物件
  4. 對食物有興趣
  5. 表現想食野
  6. 睇到匙羹會張開口
  7. 可自行閉嘴吞嚥食物

不過俾小朋友加固都要小心架~啱啱開始唔駛俾小朋友食太多,一至兩匙就夠,等佢適應咗就可以慢慢加上去。至於點解咁多媽媽會鐘意DIY果泥呢?主要係因為自己造可以自己揀材料,夠新鮮,可以即整即食,唔怕流失當中嘅營養之餘,最緊要係冇防腐劑同添加物啊~但係整果蓉都有野要注意嘅,媽媽們要留意下以下幾點:

  1. 小心清潔水果
    除咗媽媽嘅手同埋處理水果嘅器具要清潔乾淨,小朋友食嘅蔬菜水果最好唔好殘留農藥,避免用洗潔劑去洗,可以的話用暖嘅鹽水清潔殺菌就最好喇~
  2. 要選擇熟嘅水果
    因為啱啱開始加固嘅BB腸胃可能會好敏感,食咗未熟嘅果泥可能會有腹瀉嘅問題,所以最好係選擇返完全成熟嘅水果。
  3. 切忌加入任何調味料
    媽媽們可能試過啲果蓉冇乜味想加少少調味料,例如:糖、蜂蜜,緊記唔可以加入任何調味,咁樣有機會傷害到小朋友,令佢地出現唔舒服嘅症狀。
  4. 唔好幫水果飛水或過度加熱
    製作果蓉時唔需要加水,如果需要蒸熟嘅水果,要避免過度加熱,因為咁樣好易會令營養流失,媽媽們稍微加熱到常溫就可以了。

等小編介紹幾款水果俾大家DIY屬於自己嘅BB果蓉啦!

牛油果

牛油果係一種營養價值非常高嘅水果,含多種維他命、豐富嘅脂肪酸以及蛋白質,鈉、鉀、鎂、鈣等營養素,所以真係超級健康有益架~

木瓜

木瓜含有豐富嘅維生素C以及膳食纖維,補充到營養之餘,仲可以增強BB抵抗力。

蘋果

蘋果屬於比較溫和嘅水果,好啱BB食用,當中含有豐富嘅礦物質、多種維生素,唔單止可以預防BB佝僂病,仲能夠消除口腔內嘅細菌。媽媽記得將蘋果去皮壓成泥後,加溫俾小朋友食用,咁樣仲可以治療消化不良嘅問題添~

香蕉

媽媽們都知道可以潤腸通便,香蕉含有多種維生素,同時可以增強BB嘅抵抗力,促進食慾。

今次小編就講住咁多先~下次再講多啲小朋友嘅加固小貼士啦!