【HolidayMama】室內外全日放電推介~何文田公園+體育館!

【HolidayMama】室內外全日放電推介~何文田公園+體育館!


有冇諗過喺市區可以有個地方,唔駛$100就可以玩成日、大人小朋友齊放電?

今次介紹的何文田公園加體育館,本身位置都幾偏僻,唔係專登揸車或者住附近都未必會去,但係港鐵何文田站通車後,就變得好方便,喺港鐵站行10分鐘就到!

何文田體育館內有游泳池,包括2個室內同2個室外嬉水池,室內外池都有滑梯,小朋友一定好開心。只可惜游泳池內不准拍攝,所以今次主力係介紹館內另一個好玩地方,就係剛翻新的室內兒童遊戲室。

兒童遊戲室位於體育館2樓,剛剛4月底翻新完畢。未翻新前我都有同Justin嚟過,感覺好舊同埋比較適合大一點的小朋友玩。但係翻新後的遊戲室,就變左小B的天地!滑梯一定唔少得,兩層的滑梯比以前安全,田媽可以放心俾Justin自己一個爬上去玩。另外有一個設施,Justin話佢係泳池,不停扮跳水同游水!

雖然遊戲室地方唔大,只有85平方米,每節只可以容納20個小朋友,但係改裝後Justin一邊玩、一邊話so much fun!

仲未放夠電?體育館LG層可以通往何文田公園,有室外的遊樂場、籃球場、足球場,小朋友一定可以盡興而歸!

玩到肚餓點算?體育館2樓,即室內遊戲室果層,有間社企餐廳,可以去醫肚。

今日除咗游水同食嘢要錢外,其他都係免費的!係咪好抵玩呢?

 

【何文田體育館】

地址:九龍何文田忠義街一號

如何前往:港鐵何文田站B2出口,沿忠孝街 孝民街忠義街

*何文田公園設有時租停車場

 

【何文田游泳池】

開放時間 (4月至8月):

第一節 – 6:30am – 12:00pm

第二節 – 1pm -5pm

第三節 – 6pm – 10pm

*逢周三大清潔休池

 

【何文田室內兒童遊戲室】

開放時間:9am – 1pm2pm – 8pm

每50分鐘為一節,每節之間有10分鐘清潔時間。1pm-2pm為大清潔時間

*排隊進場即可

==============

Justin全職媽媽,每日嘅任務係帶住囝囝飲飲食食同玩,不斷學習做個好媽媽,發放湊仔正能量!

Facebook:田媽。玩。樂。誌