【點同大B講?】我有咗第二胎啦!-Jordi Mama

【點同大B講?】我有咗第二胎啦!-Jordi Mama


Hello大家好!我係Jordi媽媽,我有個囡囡Yasmin 已經20個月大喇,嚟緊我屋企好快會再增添多一位新成員!
登⋯登⋯登登!!因為我再次懷孕,BB已經24週喇,Yasmin好快做家姐喇!

1

睇住自己個肚一日一日咁脹大,可能Yasmin都知道自己就嚟做家姐,所以特別嗲,又特別扭計。
可能因為第二胎嘅關係,所以覺得今次個肚大得特別快,Yasmin每次跟住我換衫嘅時候都會望住我個肚,我都解釋比佢聽:「媽媽肚裏面有個BB,嚟緊你要聽聽話話,錫媽媽同肚裡面嘅BB,做個叻叻家姐!」雖然唔知Yasmin究竟明唔明白,但佢每次都會答我:「好!」之後就嘟起個咀仔,想kiss 媽媽個肚(其實都幾冧㗎!)

2

但係Yasmin有時炆憎激動得滯,都會喺我肚上面彈下彈下!我就會同佢講叫佢溫柔啲,咁樣會整到肚裡面BB,佢雖然都會繼續喊,但係就冇再跳。20個月大嘅Yasmin看似好懂事,但我知道好多野仲要慢慢教!

3

我同老公都好錫Yasmin,一有時間就會陪佢抱下佢!嚟緊嗰14週,個肚越來越大,Yasmin 又越嚟越重,我要彎腰去抱佢應該都會好有難度,所以我會每日都行多啲,希望自己唔好太「倫盡」啦! 同埋我亦都聽過,產後有啲人會關節痛主要由於身體內部分泌激素嘅變化,會導致關節鬆弛。如果產婦唔注意休息而從事較多嘅家務勞動,會令本來已經薄弱嘅關節、肌腱、韌帶負擔過重而出現疼痛。 所以生完BB 我又要等傷口復原,又唔可以拎太重嘅嘢,所以都可能有一段時間抱唔到Yasmin!相信到時Yasmin一定會有啲唔開心,我唯有吩咐老公照顧佢多啲啦! 所以產前產後,嘅呢個時候老公嘅包容,同體諒以及照顧,係好緊要架!

4

另外BB 20週左右,媽媽會開始feel到經常胎動,哩種感覺亦令媽媽感受到BB實實在在咁存在,所以媽媽們記住好好享受哩種奇妙感覺!

我宜家就放鬆心情,繼續我嘅化妝工作,一有時間就陪Yasmin親子樂,好好享受以下落嚟嘅懷孕經過!

===========================

jordiJORDI LEUNG是一位專業化妝美容師,亦是一位愛靚媽媽,愛鑽研各類型化妝、美容技術,喜愛試用嶄新的化妝、美容產品。因此JORDI亦活躍於各類形社交平台,如:facebook、YouTube 等⋯⋯分享用後感 及護膚心得,務求將自己所愛或不愛與各位分享。Jordi 媽媽宗旨是「愛靚,未必需要大花金錢,只要了解自己,扮靚也可以恰到好處!」

Facebook Page:Makeup Mama JORDI 扮靚媽媽部落