【媽媽煩惱】BB手指多倒刺點算好?原來唔關維他命事…

【媽媽煩惱】BB手指多倒刺點算好?原來唔關維他命事…


好多人手指都好常生倒刺,甚至有媽媽請教我地「小朋友咁細個生倒刺,成日搞到佢又咬手又搣,手仔都紅哂應該點算好..」其實大人同小朋友生倒刺嘅原因都係大同小異,好多人都誤以為網上流傳缺乏維他命C會令手指易啲生倒刺,所以食多啲水果就會好喇~當然水果係一定要食架啦!不過經研究指出生倒刺其實唔關缺乏維他命事架~一齊睇下係咩原因,又有啲咩方法解決先!

生倒刺原因
小朋友成日周圍走、周圍摸,手仔多咗同其他野摩擦嘅機會,而且秋冬天氣特別乾燥,如果手指嘅皮膚唔夠油脂滋潤的話就會好易生倒刺架喇~

生倒刺解決方法
1. 保持指甲衛生
雖然話成日洗手會洗走指甲旁多餘嘅油脂,但係雙手都係要保持清潔架!經常幫BB剪指甲,最緊要係要教小朋友唔好成日咬指甲同手指啊~

2. 用凡士林鎖水
我地同小朋友洗完手之後都盡量搽上冇香料、唔會引起敏感嘅潤膚露。好多人都只會記得塗手掌、手背,重要嘅係指界邊都要記得搽啊!如果依然驚唔夠油脂滋潤的話,都可以幫小朋友係指甲邊緣塗上凡士林或者,加重保濕鎖水。

3. 橄欖油按摩
橄欖油有防止倒刺生成嘅功效,BB隻手仔洗乾淨之後,媽咪可以將橄欖油塗喺佢地手上面再按摩,咁樣就可以令小朋友嘅手仔吸收到營養同時防止倒刺產生喇~

4. 切忌將倒刺撕走
好多時我地見到倒刺都會忍唔到手去撕走,但係係人都知用手直接搣走佢係唔適當架啦!最好用乾淨嘅指甲鉗剪出倒刺,唔駛剪得太入太多又或者拉扯倒刺,咁樣反而有機會發炎,令手指腫脹架!

以後大人小朋友生倒刺嘅時候,記得要用啱方法處理,咁就唔怕BB搞到手仔又紅又痛啦~