【Mama心聲】冇工人姐姐真係可以嗎?跟蹤全職媽媽24小時!

【Mama心聲】冇工人姐姐真係可以嗎?跟蹤全職媽媽24小時!


靚媽唔係第一次無工人幫手,最耐一次係半年,今次已經係第二個月了。每人一日都只有24小時,如果扣埋瞓覺8小時 (有咁多就好),就剩返只有16小時工作。

一位無工人既全職而無潔癖既媽媽,每日必要既工作包括以下最少13個項目 :
煮飯(兩至三餐)
洗碗(兩次)
簡單抹廚房(兩次)
洗衫(兩至三機)
晾衫(兩至三次)
抹地(兩次)
摺衫
收拾/洗玩具
洗厠所
幫BB換片沖涼


餵奶/餵食/在旁陪伴進食


煲水
買餸

計一計數,每個項目最多只有大約一個鐘既時間處理,而且要無間斷地完成 (當中未計處理小朋友扭計既時間、去洗手間、沖涼等一切雜務)。如果唔想當一位像家務機器既媽媽,想每日帶小朋友到公園玩玩、講講故事、互動一下,那就只可以用瞓覺既時間黎換取可貴既親子時光。

凌晨一點先沖涼兩點先晾衫家務做到半夜有咩出奇呀濕濕碎啦我試過羅

如果有一位無工人幫手既全職媽媽話你聽,佢湊小朋友唔辛苦,做埋家務都仲有私人時間剩,um……….?

無工人既日子,一腳踢,有時家務多得喘不過氣。但係繁忙既每一天,靚媽都希望可以帶靚B出外曬曬太陽,呼吸新鮮空氣,一齊鬆一鬆。你地去左公園未呀 ?

==================
beautyma作者:靚媽湊B記

一位全職靚媽,對育兒有自己的個人看法,不隨波逐流,不約定俗成,深信媽媽的眼界與堅持是成就每一個快樂寶寶的重要元素。