《我愛Mama》3、4月之星專訪

《我愛Mama》3、4月之星專訪


首先恭喜諾諾同溢溢成為《我愛Mama》3、4月之星,亦感謝諾諾媽咪同溢溢一家人出席我地嘅High Tea Gathering!小編們同兩位精靈的每月之星暢談咗一個下午,十分開心呢!

【三月之星】溢溢

溢溢係個充滿熱情同電力嘅小朋友,一見到小編就開始放電,媽媽話係佢自己學識,冇人教嫁!訪問去到尾聲嘅時候溢溢已經放晒電,表演一秒瞓著,真係又可愛又搞笑~

1

【四月之星】諾諾

諾諾比較慢熱同怕醜,不過係媽媽嘅鼓勵&枱面嘅薯條吸引下,好快就同小編混熟,仲成餐超乖坐定定係到食薯條!如果問佢邊個係靚女,佢會即刻舉手加擺Pose,睇得出平日訓練有素呀!

2

【懷孕&生產過程】

4
溢溢媽咪陀B期間一直產檢都好正常,但係到29周時去產檢,醫生突然驗出佢有妊娠毒血症,於是要緊急開刀生溢溢出嚟。溢溢出世後要瞓箱,個陣超細粒,媽咪都好擔心。喺佢出世14日嘅半夜,爸爸媽媽突然收到醫院電話叫佢地即刻過去,原來係溢溢有壞死性腸炎,要開刀切走部分腸臟,媽媽話去醫院個程車真係喊到崩潰!好彩經歷兩次手術後,宜家溢溢都好精靈,一啲都唔似早產兒,只係Poo Poo次數比正常BB多同埋發展比較遲緩。

3
諾諾媽咪去私家醫院做產檢個陣,醫生話呢胎係仔,點知有次去政府醫院檢查個陣,醫生就話呢胎係女,一個話係仔一個話係女都真係幾搞笑!諾諾媽咪喺38周半夜3點穿羊水後,痛咗6-8個陣就順產生到諾諾,過程都幾順利。佢初時都擔心諾諾會好似哥哥咁,穿完羊水幾個鐘後度數都係開得好少,最後醫生話因為哥哥太大份,順產好難生到出嚟,於是決定要幫媽媽開刀,變相兩種痛都要承受。

【復活節去咗邊?】

溢溢媽咪:復活節帶咗溢溢去咗澳門,因為嚟緊7月想帶佢去沖繩,所以今次試下帶佢去近近地嘅地方旅行。今次去咗科學館同賽車博物館,溢溢好興奮好開心,搭船都唔驚!

諾諾媽咪:復活節帶咗小朋友去機場富豪酒店住一晚,小朋友整下復活蛋,住酒店就好開心,當係去咗旅行咁!

6

【小朋友平日鐘意做啲咩?】

溢溢媽咪:多數都係自己玩,彈電子琴呀,將啲玩具搬嚟搬去。其實佢又唔係特別鐘意玩具,去玩具店都唔會扭買玩具,反而帶佢去琴行彈完琴,要走個陣會喊。見到佢咁鐘意,第時都會比佢學琴!

諾諾媽咪:主要都係睇書、砌Puzzle同Lego,其實只要將呢啲野擺係啲就手位置,小朋友就會好自然去玩。我地床後面有一個好大嘅書櫃,每晚臨瞓前佢地兩兄妹會抽啲書出嚟睇,慢慢就養成閱讀習慣。電子產品就少比佢接觸,自己少玩,咁小朋友就唔會話想要玩。

【小朋友返N班?】

溢溢媽咪:溢溢有去過N班面試,但因為個日喊就唔成功,所以宜家都係比佢返蒙特梭利Playgroup,學習自理。

諾諾媽咪:因為哥哥之前都有返幼兒園,所以諾諾6個月大個陣都入讀幼兒園,佢係包埋升上幼稚園,咁諾諾就唔洗經歷競爭面試個啲。

5

【一個黑面一個白面?】

溢溢媽咪: 佢驚我多d嘅,其他野都會慢慢同佢講,但係打人就一定唔得,蒙特梭利老師教話每次打人個陣就捉住佢、攬實佢,等佢知道每次打人之後都會冇得郁。

諾諾媽咪:其實爸爸媽媽都惡,但因為我地係自己湊,冇其他人幫手,所以從細佢地都知道自己係冇靠山,所以就算惡囡囡都會痴我。

IMG_3059_Fotor_Collage_Fotor

【做媽媽最辛苦係?】

溢溢媽咪:最擔心佢病 ,1歲前都好驚佢半夜會發高燒,因為佢唔識講邊度唔舒服,佢一病我就好心痛,真係寧願係我病。

諾諾媽咪:唔同成長階段會有唔同擔心,但只要圍繞住佢,有咩唔舒服、唔開心,我就會擔心。都想佢健康開心成長,一病就覺得其實佢學識啲咩都唔重要,但求佢健康去玩就夠喇。同埋做媽媽後就冇晒自己私人時間,所有野都圍繞住小朋友。

IMG_2793_Fotor_Collage_Fotor

【Mama的樂趣?】

溢溢媽咪:佢學識一樣野,例如配對顏色咁,或者學識講一啲野都會好開心,宜家佢識講爸爸、媽媽、姨姨個d,同埋曳曳囉!

諾諾媽咪:見到佢突然之間做啲小動作就會好開心,例如媽咪受傷佢會識得關心我,仲拎晒平日我幫佢搽個啲Lotion出嚟,個刻會覺得平日用心付出係有回報嘅!

【小小花絮】

High Tea Gathering又點少得小朋友最愛嘅薯條!諾諾由頭到尾都好專心咁食薯條,完全冇扭過計~

7

最後就要祝兩位每月之星健康快樂成長,爸爸媽媽都會陪住你地長大嫁!:)