【喺香港生仔,其實要幾多錢?】最貼地嘅養小朋友真實開支估算

【喺香港生仔,其實要幾多錢?】最貼地嘅養小朋友真實開支估算


傳統智慧話俾我哋聽「有仔趁嫩生」,但係身邊同齡嘅朋友,唔少到咗三十歲都未有計劃生仔。我深感周圍嘅人多數係因為錢銀問題而卻步:諗起醫院床錢、奶粉錢、學費、工人支出,聽同事講兩講,再上親子王國睇兩睇,邊個會都縮沙啦。不過因為計錯條數,搞到三字尾,四字頭先生仔,值得咩?只要啲錢用得明智啲,唔使月入三萬,一樣可以俾到小朋友一個快樂童年㗎!呢度我想分享下,生仔/養小朋友嘅真實開支。大家計過覺得通嘅,不妨真係早啲生仔。

A)初始開支

分娩成本

以前生仔係搵弄婆上屋企接生,生完封返封利是過佢,冇咩煩惱,唔知點解而家有好多準父母有咁多考慮。現代社會醫學昌明,只不過係要大家喺生仔之前,做多一樣嘢:産前檢查。如果你係香港永久居民,産前檢查應該係免費嘅。

你可能會諗,不如穩陣啲,去私家醫院做多個檢查吖,照多幾次超聲波吖,睇多兩個醫生吖。有保險的話去下真係無妨,通常做得産前檢查醫生都會送返輯超聲波BB相俾你欣賞,你可以當幾百蚊換堆相返屋企。你鍾意計的話可以加返每次800蚊(約數)乘以你想要幾多輯BB相。

下一個常見問題係到底要公立生定私家生。我可以好肯定噉話你知:識得生一定去公立生。

「不過,公立生,冇得開刀㗎喎!」

如果你要擇日擇時辰開刀,呢篇文真係唔啱你,你可以即刻上一頁。開刀生仔係大手術,我諗如無必要,正常人都應該揀自然分娩嘅。如果有緊急情況,公立醫院一樣會幫你開刀。

喺你做決定前,你都可以睇下公立同私家嘅價錢表先。公立分娩係免費嘅,淨係要俾100蚊一晚嘅床錢。正常分娩要喺産後房住三晚,總數盛惠300蚊。

私家就五花八門,有逐樣計錢,亦都有生仔套餐。成個套餐由十萬起跳。不過香港嘅公立醫院系統唔錯,係咪值得你俾六位數字去私家,同埋俾咗咁大嚿錢係咪會好啲,你再自己諗諗啦~

另外,公立醫院會送一堆免費湊仔班。呢啲班好緊要,直接影響到你日後嘅生活開支。所以一定要上。

【埋單:港幣300蚊 】

産後護理

如果你喺公立醫院生,喺出院嗰日,你已經係一個可以獨當一面嘅媽媽:因為所有公立醫院都要新媽媽親自照顧BB,要餵奶、換片、氹瞓覺。私家嘅就… 輸喺起跑線。不過你自己俾錢買條後啲嘅起跑線,冇得怨,係咪先?

就算你頭幾人湊得幾叻都好,總會有好多人話要請陪月,照顧媽媽嘅起居飲食。陪月嘅價錢視乎陪月員嘅經驗同工作時間。平嘅萬零蚊就有,貴嘅據講可以係大學講師嘅兩倍人工。不過同喺私家生仔一樣,如果你請咗陪月,習慣咗有人服侍你,幫細路仔沖涼、幫你煮飯呢啲,日後適應會幾痛苦。所以記住就算有人服侍你,都唔好交晒啲嘢俾人哋做呀。

又提提大家,如果媽媽嘅屋企人幫到手(警告:盡量唔好叫奶奶幫手),可以慳返一筆。不過呢個唔係死慳死抵指南。小朋友嘅嘢,應使則使,唔使刻意慳嘅。如果你好想買一大堆補品,咩滴雞精嗰啲,自己再加。奢侈品我就唔加落嚟喇。

【埋單:陪月港幣20000蚊 (15000 人工+利是,5000 湯水)】

BB用品

一有BB自然乜錢都用落佢身上。

最基本你要買嘅係:BB床、BB衫褲鞋襪、玩具、沖涼用品、餵奶樽、泵奶機、BB車

(喺你買任何嘢之前記住:每一個家長喺小朋友大咗之後,都會好想將啲嘢甩手,所以一般下面市嘅嘢都可以好平買到二手)

BB床,2000蚊。

BB車:頭兩年你會需要兩部車,一部係可以平瞓嘅車,另一部係「士的車」,一輕一重。4000蚊。

孭帶: 出出入入你會要條孭帶,貴價版大概1000蚊。

泵奶機、餵奶樽:大概都係1000蚊。

【埋單:8000蚊】

B) 每月開支

BB飲食

大家時時話生小朋友要「搵奶粉錢」,可見奶粉廣告真係深入民心。搵「奶粉錢」固然吃力,因為奶粉真係好貴。一罐奶粉可以貴到成500蚊(例如:Illuma),平嘅都250蚊樓上,每罐多頂到一毎星期。即係你每個月至少多1000蚊奶粉錢。

不過如果你住公立醫院,應該一早學識咗餵人奶。如果你肯用正常人類養育下一代嘅方式,你係應該一蚊奶粉錢都唔使俾嘅。(到半歲開始你要俾啲固體食物小朋友,不過煲下粥仔呢啲,成本應該係近乎零。)

【埋單:每個月飯錢開支600蚊,保守啲預 1000蚊】

BB消耗品

紙尿片一塊平均2蚊,每日換十塊。每個月 600蚊。

(我唔會叫大家用尿布。都話呢個唔係終極慳錢秘笈咯。)

衫褲都可以循環再用,假設你每季買5套瞓覺衫,5套出街衫,前者100蚊套,後者200蚊套,除開每個月 500蚊。

【埋單:每月1100蚊】

家居開支

有新成員可能要多間房同要多一個工人照顧佢。不過記唔記得你住公立醫院應該學識咗一大堆技能?任何有正常智商嘅人都應該足以應付一個BB嘅日常所需。

如果父母是但一方可以喺屋企睇住小朋友,一個大人就可以睇得住。絕對唔使浮誇到阿媽唔做嘢,加多個奶奶,再加多個工人。

屋方面,反正出世頭幾年,BB都係會想同父母一齊瞓。你俾間大房佢都冇用。

至於工人:你每個月要5000蚊,另加住宿嘅地方,可能會令你租金貴咗幾千。我向來尊敬呢班由第二度離鄉別井嚟香港嘅工人,對佢哋冇乜意見。不過佢哋做得好、做得唔好,都唔好靠晒工人,你都唔會想將湊仔嘅責任外判俾佢哋㗎?

學費

香港嘅學前教育有學券。所以最平嘅學校可以唔使錢。另外有一大堆中價,專針對中産嘅幼稚園,有半日、有全日,價錢嘅範圍由2000蚊(半日)去到5000蚊(半日)都有。

你或者好想小朋友學晒琴棋書畫天文地理八國語言歐陸哲學,不過記住興趣班係要錢,上堂係要用精神嘅。俾佢哋學一兩樣咪算囉。

貴族幼稚園、保鑣司機嗰啲就唔好計喇,你咁藍血就唔會睇我呢篇文啦。

學費全包學校 每個月0蚊,老牌名校連雜費 每個月8000蚊,興趣班可有可無每個月約2000蚊。


如果用相對節儉嘅計法,你頭兩年嘅開支係:

【起始投入】
分娩成本 300 + BB用品 8000 + 產後護理 20000 = HKD28,300

【每月開支】
(工人 5000 + BB 消耗品 1100 + BB 飲食 1000 ) x 24 = HKD 170,400(預多咗少少嘅,寫文嘅時候,外傭最低工資係 HKD 4,410 ; 未需要計學費,因為要兩歲先至入學。)

加埋 198700,都未夠二十萬!


點解啲人話養一個小朋友好貴?食少幾餐飯就喺返度啦?

正所謂貴有貴養窮有窮養。貴起上嚟,如果你乜都外判俾工人、學校、興趣班,你每個月用多幾萬都得;作為一個盡責嘅家長,親力親為少少,本應可以一啲都唔貴。最辛苦嘅地方,係你會少咗時間。如果你平時都係碌Facebook、轉珠爆糖、睇韓劇,你嘅犧牲就係轉化咗嗰部份嘅時間去湊仔唧。另外你會出少咗去應酬,所以每個月會慳返好多飯錢酒錢。

喺小朋友出世頭三年入面,如果有老人家可以幫手,你生仔唔會有問題。作為過來人,我只係希望大家知道,你真係唔使儲幾百萬先至去生仔。

 

原文由阿擇 (Chaaak)授權轉載

===============================
《粵典》創辦人,從事粵語研究(句法話語介面),亦都致力推廣粵文書寫,閒時亦都會編寫粵語嘅教材同學習工具|Cantonese lexicographer, teacher and researcher, founder of words.hk and advocate of Written Cantonese