【PregnantMama】發現有咗,下一步應該點做?  by 助產士港式執媽

【PregnantMama】發現有咗,下一步應該點做? by 助產士港式執媽


發現有咗,下一步應該點做?

踏入二月,又傳黎一個個好消息喇~~~
因為聖誕狂歡過後,差唔多呢個時候發現屋企將會增添新成員喇~

可能某部份人係未婚意外懷孕,咁就比較擔憂同好多野要處理。
結唔結婚好呢?生唔生好呢?呢個男人可唔可以付托終生呢?結婚先定生左先補擺酒好呢?住邊到好呢?

而我身邊大部份朋友都係結咗婚期待生小朋友嘅,所以聽到佢哋不斷傳來好消息我都好戥佢地開心!

而我開心過後第一個發問嘅問題就係下一步應該點做呀?今日就等執嗎同大家簡介一下懷孕後應該有乜嘢步驟要注意啦!

1)搵西醫

係任何一個西醫都可以幫你寫張懷孕證明書,拎住嗰封信去你心儀嘅公立醫院門診度做登記!留意醫院門診部嘅開放時間,唔好白走一趟!有轉介信,仲可以download「預約通」個app直接喺電話度就預約到產前檢查㗎啦:

-Hospital Authority 的「預約通 BookHA」

https://itunes.apple.com/…/%E9%A0%90%E7%B4%84…/id1074190076…

-另外亦都可以直接預約母嬰健康院第一次檢查見醫生係健康院做都得架,上網搵一間最接近你嘅健康院預約就得㗎啦

https://www.fhs.gov.hk/tc_chi/doc_br/antenatal_service.html

2)點解要預約公立醫院

可能你會覺得公立醫院服務態度唔好,而唔想喺公院生。但係無論你諗住係邊一間醫院生、搵邊一個婦產科醫生開刀,你都最好去公立醫院登記!因為私家婦產科醫生係隨時會因為你有高危因素而唔接受你搵佢生BB!!!!

例如你有胎盤前置,私家醫生會接受你做產檢,但特然間出血嘅話佢未必會接受入院搵佢(除非你係名人)⋯
最後都係要去返公立醫院,如果你入院連一次登記都未做過、任何血液報告基本懷孕資料都冇嘅話,情況就更緊急啦!對媽咪同BB都比較危險!所以最好公立私立兩邊檢查

3)檢查

如果你排咗公立醫院門診佢就會寄封信俾你約你返去見醫生助產士,同埋做Oscar,即係「一站式產前檢查」!包括抽血、照超聲波度BB頸皮、去推測唐氏綜合證屬於高還是低風險!度頸皮測試都多數會安排喺11至13週做,如果太遲發現,比唔到期你,可能就要做第二孕期嘅風險評估,準確度就會低咗架喇,所以一發現懷孕就盡快去預約產前檢查啦!

如果你全程都係公立做產檢嘅話呢個超聲波可能係你懷孕期唯一一次照到嘅超聲波,因為公院冇資源為每一個媽媽做結構性超聲波。因為公立冇得做,所以私家醫生嘅結構性超聲波名額就變得十分之緊絕啦!最好10週左右就要去搵定想搵邊個醫生照結構㗎啦!遲咗好容易book唔到㗎

4)safe T21 vs NIFTY

另外媽媽可以自費去私家做抽血檢查,檢驗BB到底有冇遺傳病同埋可以知道佢哋嘅性別,之前好多文章都講過呢個Safety 21技術係香港中文大學一班醫生全球首創!!好叻叻豬啊!!目的就係當唐氏綜合證屬於高風險人士,可以用一個最快嘅方法去篩選,到底BB係唔係真係有唐氏綜合症,咁媽媽就唔需要等到16至20週先去做抽羊水測試,因為當你懷疑BB有問題每分每秒嘅等待都係煎熬!

不過無論唐氏綜合證篩選定係saft T21篩選,兩個都唔係診斷檢查,結果只可以作為參考始終抽羊水測試先至係一個確診檢查!

5)家居

喺香港土地問題係最大嘅問題!我哋作為基層,基本上冇一個人嘅居住環境係足夠大,可以比小朋友無憂無慮跑跑跳跳咁成長,除非你夠資格拎綜援或者拎公屋,如果唔係雙方父母在職,要請工人或者四大長老湊B,屋企點樣都係唔夠住,唉。。香港問題我唔想多講啦。。諗起就心傷。。

想講嘅係屋企點都要有個位放BB衫BB床high Chair等等,其中BB床係必需!必需!必需!呢樣嘢實在太重要啦!!BB係一定一定一定唔可以同父母一齊瞓!尤其係初生!媽媽日日夜夜餵奶,半夜會好眼瞓!好容易會一時懶瞓壓親BB都唔知!幾唔夠位都好,最少最少要有一個床上籃將BB同父母分開!!

以上就係以助產士知識同執媽生仔經驗綜合而成嘅一啲建議。我知道好多媽媽係啱啱知道懷孕,都唔夠膽同人講,如果你身邊有朋友懷孕想知道點處理嘅話都可以去Share呢篇文章俾佢哋睇啦~

======================================
港產執媽一名
香港出生,正宗香港是我家
志在分享香港產科所見所聞
同時分享產科知識,正所謂「知得多就驚得少」

Facebook:港式執媽