【PregnantMama】註冊助產士:乙型鏈球菌普檢知多少

【PregnantMama】註冊助產士:乙型鏈球菌普檢知多少


《媽子姑娘小劇場》

媽媽:哎呀姑娘呀!我就黎要檢乙型鏈球菌喇!痛唔痛架,我好擔心呀!?

姑娘:痛就唔係好痛既,少少唔舒服咁啦!忍一忍!都係為BB好~

媽媽:吓!關BB咩事?

姑娘:咁就要聽我講個小故事喇!

===============

想當年,我重喺BB深切治療部既時候,就係一個小B教會我咩係乙型鏈球菌既!
呢個小B唔止早產得三十週,佢重要係BBA 小B。
BBA咁勁?做生意嘅?非也!BBA (born before arrival )即係佢嚟醫院前就岀咗世~
佢重要係馬桶裏的小B!佢嚟到時需要急救插喉,正當我哋以為小B情況穩定落嚟,佢就發燒抽筋了,而且燒一直唔退,
最後就發現係由乙型鏈球菌感染所導致既腦膜炎。

好好彩,小B經歷左一段好長時間既治療岀到院~
但其實以前未知乙型鏈球菌感染對BB影響時,BB夭折率係比宜家高好多,所以每個孕婦係35-36週都必須接受乙型鏈球菌檢查。
過程其實只係喺下陰道同肛門位拎少少樣本,五分鐘都唔使!
但就可以大大減少咗經陰道產BB受感染既機會~

「點樣可以減少受感染嘅機會?」
如果證實帶有乙型鏈球菌嘅媽媽喺作產時或穿水後~就會開始靜脈注射既抗生素直到生完為止。
穿水嘅話醫生都會建議盡早催生,因為一穿水BB少咗羊膜保護感染風險大增!

「咁點解唔個個都打抗生素呀?」
當然係因為研究顯示全部產婦打抗生素對比只有乙型鏈球菌帶菌嘅媽媽打,
對嬰兒夭折率都無大既分別,所以唔使個個都捱打針㗎!

「咁有乙型鏈球菌點算好?係咪性病嚟㗎!?點話俾老公知好!」
答案係否定嘅!
佢只係一種係女性陰道常見既細菌,對女士本身無大影響,都無需要搵消毒藥水灌洗。
因為用灌洗殺菌可能會影響陰道酸鹼度,而增加陰道感染嘅風險。

「分分鐘我都有㗎!唔驗唔知啫!咁我計劃剖腹產,又使唔使驗呢?」

又真係唔需要㗎,因為唔經陰道理論上唔會感染到!所以大家唔好驚呢個檢查喇!BB健康就靠你驗一驗~

Nurseee

==============

nurse現職婦產科註冊助產士,曾經於bb及兒童深切治療部工作。因為太愛BB,就去學習成為第一個迎接小寶貝岀世的人,更由此感受到媽媽們的偉大!
致力分享婦產科醫師都唔得閒解釋的好孕事資訊!有任何疑問歡迎透過我的專頁問我及追蹤我的專頁!一定知無不言同你分享!

FB:關你Nurse事