【Holidaymama】平民價剪髮 x 小型賽車場—新蒲崗單剪屋

【Holidaymama】平民價剪髮 x 小型賽車場—新蒲崗單剪屋


想同小朋友去剪頭髮,但大部分小朋友都好怕剪頭髮,通常都會喊。偏偏芊嶠由細到大都肯比人剪頭髮,無論係識唔識都好,佢都會肯剪,雖然都有扭計嘅時候。就係前排,比嶠媽發現左一間新開嘅單剪髮型屋,單剪同快剪唔同,快剪用5-10分鐘就剪好一個頭,單剪係好用心去剪每一個頭!髮型屋位於新蒲崗,好近嶠媽屋企,鑽石山地鐵站行去都唔算太遠。

講返先,一入到髮型屋,就見到有兩架車車,係比小朋友坐係上面剪頭髮架!係咪好型先?

而且兩架車車前面,都會有唔同主題嘅貼紙,仲有兩款唔同公仔嘅鏡添!芊嶠都覺得好吸引!kiu2

因為係單剪屋,如果去到遇到有小朋友剪緊,咁哩個時候就可以玩住等啦!店內有個小型賽車場,有兩架米奇老鼠電單車,等小朋友可以一路玩一路等!仲有紅綠燈,令小朋友更投入,仲有幾個街名貼左係牆,真係好似係街到揸車咁!

就係哩兩架米奇老鼠造型電單車,係咪好正先?男仔同女仔坐上去,都立即變成賽車手。

仲有哩架綠色跑車,但壞左,咁就上去影返張沙龍啦!睇下劻霖幾認真咁擺pose!kiu3

芊嶠選左白色跑車,坐上去,之後披上一張好大張嘅剪髮巾,塊巾仲可以包埋架車!嶠媽覺得有樣野好特別,你地見唔見到巾中間有個透明位?小朋友手仔係入面可以揸住呔盤,透明果個位可以望到架!髮型師哥哥好細心咁幫芊嶠剪頭髮,剪完就算吹頭,芊嶠都冇有怕!

剪完後,我叫芊嶠影返張相,髮型師哥哥仲開埋跑車兩對門,等芊嶠可以型住影相,但哩位小朋友冇一張相望鏡頭,一時又話要關跑車門,一時又話要落去揸電單車,哥哥想幫佢影張靚相都唔肯望鏡頭!講返,芊嶠哩個冬菇頭,顯得佢好可愛,成日好想笑佢,太可愛了!剪完唔洗即刻走架!可以再去賽車場到揸返幾轉再走都得!kiu1

另外,如果小朋友唔玩車車或唔坐車車剪髮,不論男女老少,都只係$60。但如果要係兒童專區剪髮,包括坐車車剪和玩車車,咁就要比$80架啦!而且只限130cm以下小朋友咋!

**星期六、日,公眾假期可能會較多人,可以的話先預約,會比較好。

======================
One Quick Trim 單剪屋
分店地址:九龍新蒲崗爵祿街21號地下 (可立中學旁,華潤超市隔離)
營業時間:10:00am – 9:00pm (星期一至日)
Whatsapp:6656 2322

==================

kiufam嶠媽簡介:喜歡分享,想同大家分享與細佬的生活點滴,吃、喝、玩、樂、育兒資訊,家庭生活,親子好去處。

FB Page: 芊嶠與細佬·雞蛋仔