【週末好去處】全港第三大兒童遊戲室 @ 圓洲角體育館 + 銀城街小花園@HolidayMama

【週末好去處】全港第三大兒童遊戲室 @ 圓洲角體育館 + 銀城街小花園@HolidayMama


雖然已經開始入冬,日頭夜晚都好凍,但中午時分,太陽曬到正,都仲係會熱到流哂汗。所以今次嶠媽介紹係圓洲角體驗館入面嘅兒童遊戲室,有冷氣又有軟墊,絕對係室內放電嘅好去處。

圓洲角體育館係約一年前落成,入面最吸引嶠媽嘅都係個兒童遊戲室,佢係用森林來做主題,主要是用綠色來配襯,一望再望都覺得好舒服。門外有個排隊位,一個小朋友就只可以一位家長坐係出面排隊,但平日去冇咁多人嘅時間就唔洗排隊囉!

入到去,貼住落地玻璃窗,有個位連住一張長長軟墊,本來應該係可以比大人小朋友坐係到休息,但我都見到有小朋友係上面行和爬,但要行和爬都要小心,因為都唔算矮,跌落來是軟墊都會嚇親小朋友,所以要好小心!

長軟墊前面就有間屋仔,屋仔內可以容納4至5位小朋友,大家入去玩,芊嶠仲同其他小朋友傾計,唔知佢地講啲咩呢?之後行前少少又有架船仔,兩邊有梳化凳比你坐,中間仲有個掌舵,可以比小朋友一試做船長嘅感覺,其他小朋友都可以坐係兩邊嘅梳化凳,好似真係坐緊船仔咁,同三五之己一齊來玩,可以輪流試做船長揸下船仔,又可以坐梳化傾下計,都幾開心。

船仔嘅左手面,貼住牆有幾款比小朋友學手腳協調嘅玩具,啱哂一歲多少少嘅小朋友玩!行過小小有個小圓圈,好似專登整來比細小學爬嘅小朋友玩,不過芊嶠就當佢冇到,係咁跑落去跑返出來!行到盡,有由一班小朋友用軟墊搭建出來嘅小路,小朋友都係一個一個,由頭行到尾,芊嶠就一支箭咁行到尾。

另外係船仔右面,有個坐枱,上面有幾條唔同嘅路,小朋友可以挑戰下手眼協調,用手仔把珠仔由頭移動去到終點,都幾好玩。雖然細佬仔劻霖未識玩,但嶠爸係到玩,佢都望得好認真!

再過少少,就有一個滑梯,但上滑梯個條唔係著通嘅樓梯,係一個二個圓形圈圈痴左係到,小朋友要爬上去都要考技術,唔係咁易架!一唔小心就會跌返落來,要唱返句「我要努力向上」先得!

玩完遊戲室,行返去體育館後面,有個銀城街花園,入面有個小公園,都幾多野玩。當然離不開有滑梯,滑梯有唔同長度,唔同顏色。最有挑戰性嘅係上滑梯嘅樓梯,有唔同嘅樓梯,考驗下小朋友係咪可以用自己嘅方法上到哂咁多條樓梯,芊嶠就有一條真係唔識上。

另外,仲有少少玩具係公園中間,有個琴,小朋友可敲響一條條管,就會有聲音發出。又有個鼓,可以比小朋友拍打下。仲有塊鏡,小朋友可以照下鏡,最頂唔順佢竟然錫落塊鏡到!想帶小朋友去放電嘅媽媽,可以考慮帶小朋友去係第一城站附近嘅圓洲角體育館玩啦!

溫馨提示:

~呢個室內遊戲室絕對係放電聖地,芊嶠係入面跑呀跑,跑到忘我,劻霖就係入面觀察,未肯爬,識爬嘅話係入面爬都要小心,因為大嘅小朋友係會係入面跑,有時可能未必望到細嘅小朋友,會踩到佢地

**************************
圓洲角體育館

地址:新界沙田銀城街35號 (港鐵第一城站 B 出口,再步行約 5分鐘)
開放時間:每日上午7時至晚上11時 (定期保養日除外)
電話:2509 9108

銀城街花園

地址:銀城街 (圓洲角體育館後面)
入場費用:免費


==================

kiufam嶠媽簡介:喜歡分享,想同大家分享與細佬的生活點滴,吃、喝、玩、樂、育兒資訊,家庭生活,親子好去處。

FB Page: 芊嶠與細佬·雞蛋仔