【週末好去處】期間限定!本土懷舊x網球熱鬥一番!網球親子同樂區@HolidayMama

【週末好去處】期間限定!本土懷舊x網球熱鬥一番!網球親子同樂區@HolidayMama


今個星期想帶小朋友去玩,維園將舉行《保誠香港網球公開賽2017》,場外仲有《網球同樂區》,區內有唔同類型嘅親子活動同攤位,仲有特色食品,啱晒一家大細去維園玩。

網球彈珠大比拼

場內有網球彈珠大比拼,每人有30秒,上面有工作人員會將啲網球放落個彈珠機到,網球會喺唔同位置跌落嚟,參加者就要用網跟住啲網球跌落嚟位置,接住啲網球,限時內睇下接到幾多個,仲會有記錄,睇下你哋又可以接到幾多個?暫時最高記錄係24個。

巨型網球遊玩區

場內有個架空巨型網球遊玩區,有幾個大網球,小朋友見到一定好開心,仲可以同埋爸爸媽媽一齊去推下啲網球,睇下小朋友又夠唔夠高拍到啲網球。另外有個迷你網球場,等大人同小朋友可以一展身手!

網球遊樂場

網球遊樂場都好啱大人同小朋友去玩架,可以拎起球拍,將波波向上打,嘗試將啲波波入落個網到,太細嘅小朋友,哥哥們就會叫佢地用手拋波波入去。

壞蛋獎門人活動

小朋友仲可以去Now TV 攤位,可以同Minions影相,影完相之後upload上Facebook加埋盞鬼對白,仲有機會贏走《壞蛋獎門人》大富翁一盒。攤位內仲有得整印水紙,小朋友自己選左鐘意嘅公仔,姐姐們就會幫小朋友整落佢地想整嘅位置。

自製杯麵

大人同小朋友都可以試下去自製杯麵,揀一款湯底再配搭四款配料,這個杯麵絕對係獨一無二,完全屬於你嘅杯麵﹗因為從杯身到湯底到配料,都係由你自己設計和決定,可以讓大人同小朋友發揮無限創意,想點畫就點畫。最後仲有個靚靚包裝比你拎走,真係大人同小朋友都會好享受。

維記牛奶攤位

嘩!仲有掟彩虹玩,原來係維記牛奶攤位,只要光顧維記牛奶買任何一樣產品,就可得一張遊戲卡,拎住遊戲卡,就可以換到三個金幣,大人同小朋友都可以掟,禮品有維記牛奶VIP卡,半脂牛奶236ml,乳酪飲品220g,維記雪糕。玩到累去維記買盒奶飲,又可以解渴,又可以碰碰運氣。維園士多以七十八十年代嘅懷舊玩具同小食作做裝飾,大人可懷緬昔日小食,另外仲有個懷舊攤位遊戲,可以比大人同小朋友大展身手。

影相區

大人同小朋友,都可以去埋SONY攤位,佢地會用最新型A9,幫大人同小朋友影相,佢地仲會有埋網球拍同埋其他道具借埋比你,想影低打緊網球時嘅風采又得,想同小朋友影可愛嘅相又得,之後可以選一張心愛嘅相,SONY仲會曬返比你添,大約15分鐘就可以返嚟拎,可以係左邊有個架,個到會夾住曬左出嚟既相,見到自己個樣就係個到拎返啦!另外,可以順便Like埋Sony Hong Kong Facebook,就會有條冰巾送返添!

製作愛心T恤

另外,小朋友可以繪畫形式製作愛心T恤,大人就可以用電話程式製作。愛心T恤所籌得嘅款項將用於支援網球總會,為來自基層家庭有特殊教育需要嘅年幼學童提供免費網球訓練㗎!係咪好有意義先?

小食區

場內嘅仲有好貼合今次網球嘅主題小食同飲品,要試下個芝士雞肉網球包,同埋網球型杯嘅飲品,個網球杯仲可以拎走,返屋企洗乾淨再用。

***********************************
網球親子同樂區
價錢:免費入場 (某些活動是要自費,例如:自製杯麵、愛心T恤等等)
日期:10 月 8 日至 15 日
開放時間:10 月 8 日 (星期日)上午10a.m.
10 月 9 至 12日 (星期一至四)下午2p.m.
10 月 13 至 15 日 (星期六至日) 中午12p.m.
活動完結時間請到官網查詢(www.hktennisopen.hk/zh/overview/tournament-village/

地點:維多利亞公園 (香港銅鑼灣興發街1號)

==================

kiufam嶠媽簡介:喜歡分享,想同大家分享與細佬的生活點滴,吃、喝、玩、樂、育兒資訊,家庭生活,親子好去處。

FB Page: 芊嶠與細佬·雞蛋仔